Во Медијатеката на Локалната библиотека „Гоце Делчев“, Велес во соработка со Клубот на писатели ,,Коста Солев Рацин”, беше промовирана книгата „Детски мечти“ од велешката авторка Лила Арсова. Оваа книга во која има седум приказни кои на различен начин го објаснуваат значењето на другарувањето и љубовта ја доби и наградата „Пелистерски ракувања“ на Дата –Песнопој Битола .
„Сите мои дела се наменети за децата и младите, иако книгата нема возрасна граница за која публика е наменета. Уживам додека ги пишувам, уживам додека ги читам, уживам додека ги раскажувам“ – кажа Арсова која е одделенски наставник во подрачното училиште на ОУ Васил Главинов во населба Превалец.
Промоторот Васил Тоциновски преку интеракција со присутните деца во публика успеа да прокоментира дел од сказните и напомена дека „детските мечти“ се всушност филозофија за пријателство, поточно другарување на детето со животниот свет.
„Новата книга на Арсова е концепт кој нуди седум приказни, бајки, за седум дена, или за секој ден од седмицата по една. Во книгата централна личност е детето, кој е секундарна појава, бидејќи се околу него е главната тема која ја интересира авторката. Тоа се домот и семјеството, традицијата, пријателството. Детските мечти се филозофија за пријателство и другарување на детето со животните, растителениот свет“ – кажа Тоциновски.
